Finndu rétta tíðni fyrir tölvupóstinn þinn

Flestir hata að fá ruslpóst í pósthólfin sín, en hvernig veistu hver rétta tíðnin er þegar þú sendir viðskiptavinum þínum tölvupóst?

Það getur verið erfitt að finna rétta jafnvægið milli þess að vera efst í huga fólks og þess að verða ekki að ónæði. Þú vilt ekki bombarda viðskiptavini þína með tölvupóstum á hverjum degi, en þú vilt heldur ekki að þeir gleymi þér.

Skoðaðu leiðbeiningarnar okkar um hversu oft þú ættir að senda viðskiptavinum þínum tölvupóst til að fá ráð um hvernig þú finnur rétta jafnvægið fyrir fyrirtækið þitt.

Áhrif tíðni tölvupósta

Áður en þú ákveður hversu oft þú sendir tölvupóst er mikilvægt að skilja hugsanlegan ávinning og galla þess að senda tölvupósta of oft eða ekki nógu reglulega. Þetta snýst allt um að finna fullkomið jafnvægi og þá tíðni sem hentar viðskiptavinum þínum best. Hér eru nokkur atriði sem vert er að hafa í huga:

1. Að senda markaðstölvupósta ekki nógu oft

Kostir:

• Meira mikilvægi og virði: Með því að senda færri tölvupósta geturðu tryggt að hvert skeyti sé mjög markvisst og viðeigandi fyrir viðskiptavini þína, sem getur aukið upplifað virði þess og þátttöku.
• Bætt orðspor sendanda: Færri tölvupóstar geta dregið úr hættunni á kvörtunum vegna ruslpósts og viðhaldið jákvæðu orðspori sendanda, sem getur bætt afhendingarhæfni og þátttöku.
• Meiri eftirvænting og þátttaka: Þú getur skapað tilfinningu fyrir eftirvæntingu og einkarétti meðal viðskiptavina þinna, sem getur aukið þátttöku þeirra og viðbrögð.

Gallar:

• Minni sýnileiki vörumerkisins: Ef þú sendir ekki nógu marga tölvupósta geta viðskiptavinir gleymt þér eða, það sem verra er, leitað til keppinauta þinna.
• Minni líkur á þátttöku: Minni líkur eru á að viðskiptavinur sjái skilaboðin þín og bregðist við þeim.
• Minni líkur á viðskiptum: Minni líkur eru á að viðskiptavinur grípi til þeirra aðgerða sem þú vilt, til dæmis að kaupa vöru.

2. Að senda markaðstölvupósta of oft

Kostir:

• Líklegra er að vörumerkið þitt haldist efst í huga fólks: Með því að senda fleiri tölvupósta geturðu tryggt að minni líkur séu á að viðskiptavinir gleymi fyrirtækinu þínu.
• Aukin þátttaka: Líklegra er að viðskiptavinir sjái skilaboðin þín og bregðist við þeim.
• Betra viðskiptahlutfall: Því fleiri tölvupósta sem þú sendir, þeim mun meiri líkur eru á að viðskiptavinur grípi til þeirra aðgerða sem þú vilt, til dæmis að skrá sig á vefnámskeiðið þitt.

Gallar:

• Aukin hætta á kvörtunum vegna ruslpósts: Ef viðskiptavinum finnst þeir vera yfirhlaðnir af tölvupóstum gætu þeir merkt skilaboðin þín sem ruslpóst, sem getur skaðað afhendingarhæfni þína og orðspor sendanda.
• Minni þátttaka og færri viðskipti: Ef viðskiptavinir fá of marga tölvupósta frá þér gætu þeir farið að hunsa eða eyða þeim án þess að lesa þá, sem getur dregið úr þátttöku og viðskiptum.
• Hætta á afskráningum: Ef þú sendir of marga tölvupósta geta viðskiptavinir fundið fyrir „tölvupóstsþreytu“ og afskráð sig alfarið af póstlistanum þínum, sem getur minnkað áhorfendahópinn þinn og mögulegar tekjur.

Skilgreindu markmið fyrirtækisins

Gefðu þér tíma til að hugsa um hverju þú ert að reyna að ná fram með tölvupóstunum þínum. Ertu að reyna að auka sölu? Fræða viðskiptavini um nýja vöru? Auka umferð á vefinn þinn?

Tíðni og innihald tölvupóstanna þinna ætti að endurspegla það markmið. Ef markmiðið er sala skaltu hafa skýra ákall til aðgerða, en ekki senda tölvupósta of oft og draga þannig úr áhrifum þeirra. Ef markmiðið er fræðsla skaltu hafa tengla á gagnlegt efni, svo sem bloggfærslur.

Að lokum munu markmiðin þín hafa áhrif á það hvers konar tölvupóstsefni þú býrð til, til dæmis tilboð, uppfærslu eða fréttabréf.

Kynntu þér óskir viðskiptavina þinna

Besta leiðin til að byrja er að kanna hversu oft viðskiptavinir þínir vilja fá tölvupósta. Spyrðu þá spurninga á borð við:

• Hversu oft viltu fá tölvupósta frá okkur?
• Viltu frekar fá eitt stórt fréttabréf eða mörg styttri?
• Hvaða efni hefðir þú áhuga á að fá uppfærslur um?

Þetta hjálpar þér ekki aðeins að ákvarða tíðnina, heldur einnig hvers konar efni þú ættir að senda. Þú getur líka notað gögn um þátttöku í tölvupóstum til að skilja óskir viðskiptavina. Skoðaðu hvaða tölvupósta viðskiptavinir þínir opna og smella mest á og notaðu það til að móta efnið þitt.

Annar möguleiki er að gefa áskrifendum tölvupóstlistans þíns kost á að velja hversu oft þeir vilja fá tölvupósta frá þér. Þú getur gert þetta við skráningu, í endurvirkjunarferli eða með því að hafa óskamiðstöð í tölvupóstunum þínum.

Hugleiddu hvers konar vöru eða þjónustu þú býður upp á

Tíðni tölvupósta getur verið mismunandi eftir því hvers konar vöru eða þjónustu þú býður upp á. Ef um áskriftarþjónustu er að ræða, eða eitthvað sem viðskiptavinir þurfa að kaupa aftur reglulega, geta tíðir tölvupóstar hjálpað til við að halda þeim virkum og minna þá á að kaupa.

Ef þú selur hins vegar vörur á borð við húsgögn eða raftæki, sem fólk kaupir yfirleitt ekki oft, gætirðu viljað senda færri tölvupósta. Þú vilt ekki að viðskiptavinir verði ónæmir fyrir skilaboðunum þínum eða afskrái sig.

Settu upp stefnu fyrir tíðni tölvupósta

Nú þegar þú hefur skilgreint markmið fyrirtækisins og óskir viðskiptavina er kominn tími til að búa til áætlun um tíðni tölvupósta. Ákveddu hversu oft þú vilt senda tölvupósta og hvers konar efni þeir eiga að innihalda.

Þú gætir viljað prófa mismunandi tíðni fyrir ólíkar tegundir tölvupósta til að sjá hvað virkar best fyrir áhorfendahópinn þinn. Ef þú ert til dæmis að senda tölvupóst með tilboði gætirðu sent hann á 10 daga fresti og síðan á 20 daga fresti til að sjá hvor tíðnin skilar betri árangri.

Það er líka mikilvægt að muna að tíðni tölvupósta er aðeins einn hluti jöfnunnar. Þú ættir einnig að huga að gæðum og mikilvægi efnisins, sem og hversu vel það er miðað að viðskiptavinum þínum.

Prófaðu og aðlagaðu stefnuna þína

Nú þegar þú ert kominn með áætlun um hversu oft þú sendir viðskiptavinum þínum tölvupóst er kominn tími til að prófa hana. Byrjaðu á að senda tölvupósta með þeirri tíðni sem þú ákvaðst og fylgstu með þátttökumælikvörðum á borð við opnunarhlutfall, smellihlutfall og afskráningar til að skilja óskir viðskiptavina þinna.

Ef niðurstöðurnar eru undir meðallagi skaltu aðlaga stefnuna þína. Prófaðu að breyta tíðni, innihaldi eða markhópum til að sjá hvort þú getir bætt árangurinn. Haltu áfram að prófa og aðlaga þar til þú finnur rétta jafnvægið fyrir bæði þig og viðskiptavini þína.

Samantekt

Að finna rétta tíðni tölvupósta er ferli þar sem reynir á tilraunir og mistök. En þegar þú finnur réttu leiðina byggirðu upp meira traust og viðskiptavinir þínir verða virkari og tryggari fyrirtækinu þínu.

Mikilvægt er að huga að óskum viðskiptavina, þeirri vöru eða þjónustu sem þú býður upp á og markmiðum fyrirtækisins. En það er einnig mikilvægt að halda áfram að prófa og aðlaga tíðni tölvupósta til að finna hvað virkar best fyrir þig og viðskiptavini þína. Byrjaðu því á að kanna skoðanir viðskiptavina þinna og settu síðan upp áætlun út frá svörum þeirra.

Fylgstu með þátttökumælikvörðum á borð við opnunarhlutfall, smellihlutfall og afskráningar til að skilja hversu oft þú getur sent þeim tölvupóst án þess að yfirbuga þá. Og að lokum skaltu halda áfram að prófa þar til þú finnur hvað skilar árangri fyrir fyrirtækið þitt – og byrjaðu svo að senda!